ဘဲဥ
“ ဘဲဥဘယ်လောက်လဲ ”
“ ၄၀၀ ”
၁၉၈၈ အထိပြန်တမ်းဝင်အရာရှိလစာ ၄၅၀/ကျပ်။ဘဲဥတလုံးတကျပ်တကျပ်ခွဲရှိခဲ့တယ်။အခုဘဲဥတလုံး ၄၀၀/ဆိုပဲ။နှစ်ပေါင်း (၃၅)နှစ်အတွင်းမြန်မာနိုင်ငံပျက်စီးဆုတ်ယုတ်ကျဆင်းခြင်းအမှတ်လက္ခဏာတခုပါ။၂၀၂၃ ဘဲဥတလုံးပေါက်ဈေးဟာ ၁၉၈၈ ခုနှစ်အစိုးရပြန်တမ်းဝင်အရာရှိတယောက်တလစာပါ။
ဘဲဥသည်ကဈေးသာရောင်းနေရတယ်။မှိုင်တိုင်တိုင်ငေါင်တောင်တောင်နဲ့။အရောင်းအဝယ်မကောင်းလို့ထင်တယ်။ကိုယ်ကဘာမှမမေးရသေးဘူး။သူကပြောပြတယ်။
“ ဦးလေးရေ…ကိုယ်ရင်းရတဲ့ငွေသာများလာတယ်…ရတဲ့ကုန်ပစ္စည်းကနည်းနည်းလေး..ရတဲ့အမြတ်ကဒီလောက်ကဒီလောက်ပဲ…နေ့ပြန်တိုးယူရောင်းရတာအခန့်မသင့်ရှုံးအုံးမယ်”
ကျွန်တော်ကဘဲဥကိုနားမလည်ပဲနားလည်သလိုဟိုကိုင်ကြည့်ဒီကိုင်ကြည့်လုပ်ရင်း။
“ ဘယ်ကဥလဲ”
“ ဖျာပုံက”
ဈေးသည်ကပျင်းရိပျင်းတွဲဖြေတယ်။ဘဲဥဈေးလာမေးပြီးမဝယ်ပဲနဲ့အင်တာလာဗျုးနေလို့။
“ ဖျာပုံကဘဲဥလား”
“ ဖျာပုံမြို့ပေါ်တော့မဟုတ် ဘူး…အနားကရွာတွေကစုကောက်ပြီးဖျာပုံမြို့ပေါ်ကဘဲဥဒိုင်ဆီပြန်သွင်းကြတာ ”
“ ဟ…ဖျာပုံ…ညီလေးကိုယ်တိုင်သွားဝယ်တာလား”
“ ဟာ…ဦးလေးကလည်း…ဘယ်လိုသွားဝယ်မှာလဲ..ဖုန်းနဲ့မှာလိုက်ရင်ဆိုင်လာချပေးတာ ”
“ ဟုတ်လား..တလုံးဘယ်ဈေးဆိုပြီးဝယ်ရတာလား ”
ဈေးသည်လေးကခေါင်းတဗျင်းဗျင်းကုပ်ပြီးစိတ်ညစ်တဲ့အသံနဲ့။
“ မဟုတ်ဘူးဗျ…. တဆွဲဈေးနဲ့ဝယ်ရတာ”
“ ဘာလဲတဆွဲ”
ဈေးသည်လေးကစိတ်ညစ်ညစ်နဲ့မော့ကြည့်တယ်။ဈေးဝယ်အမျိုးသမီးတယောက်လာလို့ဘဲဥရွေးသလိုနဲ့သူ့ကိုခဏအနားပေးထားလိုက်တယ်။ဈေးဝယ်ထွက်သွားတော့မှနားလည်သလိုနဲ့။
“ ဘဲဥတွေကလတ်တယ်နော်”
“ အခုမနက်မှလာချတာ ”
“ တဆွဲဆိုတာဘာလဲညီလေး ”
သူစိတ်မပျက်အောင်ဘဲဥငါးလုံးခြင်းထဲထည့်ရင်မေးလိုက်တယ်။
“တဆွဲမှာဆယ်ကဒ် …တကဒ်ကိုအလုံးသုံးဆယ်”
“ အလုံးသုံးရာပေါ့် ”
“ ဟုတ်…ကိုယ်လိုသလောက်လေးဆွဲငါးဆွဲမှာရောင်းရကြတာ”
“ ကြက်ဥဆိုရင်ကော”
ဈေးသည်ကထုံးစံအတိုင်းခေါင်းကုပ်ပြီး “အတူတူပဲဦးလေးရေ” ပြောပြီးဘဲဥငါးလုံးကိုကြွတ်ကြွတ်အိတ်နဲ့ထည့်ပေးတယ်။
ဘဲဥကောင်းမကောင်းကိုဖုန်းဓါတ်မီးအသေးလေးနဲ့ထိုးကြည့်နေတာဘယ်လိုကောင်းမကောင်းခွဲလည်းမေးချင်ပေမယ့်မမေးဖြစ်တော့ဘူး။ဘဲဥဘိုး ၂၀၀၀/ ပေးပြီးနောက်တခုထပ်မေးလိုက်သေးတယ်။
“ညီလေးကိုပစ္စည်းလာချရင်ငွေအကျေတန်းချေရတာလား…ငွေချန်လို့ရလား”
“မရဘူး...ချက်ခြင်းတန်းချေပဲ…အကြွေးလည်းမရဘူး..ခေါက်ပြန်ပေးလည်းမရဘူး”
မြန်မာငွေ ၂၀၀၀/ဆိုတာ ၁၉၈၈ မတိုင်ခင်ဌာနဆိုင်ရာညွှန်ကြားရေးမှူးချုပ်/DG လစာထက်များတယ်။ ၁၉၈၈ ညွှန်ချုပ်လစာအများဆုံး ၁၅၀၀/ ပဲရှိမယ်။၁၉၈၈ ညွှန်ကြားရေးမှူးချုပ်တလစာထက်များတဲ့ဘဲဥငါးလုံးဝယ်ပြီးရေးစရာကုန်ကြမ်းရှာခဲ့တယ်။မြန်မာငွေတန်ဘိုးအခုလိုဇောက်ထိုးကျနေပုံနဲ့မကြာခင် "ဘဲဥဆယ်လုံးတသောင်း" မဖြစ်ဘူးမပြောနိုင်ဘူး။
လွင်ဦး(ရန်ကင်း)
Comments
Post a Comment