ဂျင်းလွတ်လပ်ရေး

 ၁၉၄၃ ဩဂတ်စ် ၁ ရက်နေ့မှာဂျပန်ဟာ မြန်မာကို "လွတ်လပ်ရေး" ပေးခဲ့တယ်။ “ ဂျင်းလွတ်လပ်ရေး ” ပေးခဲ့တာဆိုပေမယ့်ဂျပန်ပေးတဲ့ဂျင်းကတန်တယ်။ဘာလို့ဆိုတော့ဂျပန်ဟာမြန်မာကိုဂျင်းတခေါက်ထည့်ခဲ့မိတာပြန်ပေးဆပ်နေရတဲ့တန်ဘိုးကခုထိမကျေနိုင်သေးလို့ပါ။

ဂျင်းထည့်တဲ့စကားဘယ်သူထွင်လိုက်လဲမသိဘူး။အတော်တွင်ကျယ်နေတယ်။ဂျင်းထည့်တာကိုဟိုးအရင်ကရွှေရည်စိမ်အတုအယောင်လို့သုံးခဲ့ကြတယ်။ကျနော်တို့ခေတ်ကကလိန်ကကျစ်လာမလုပ်နဲ့၊အင်ကြီး၊ဘတ်သွားတယ်အစုံသုံးကြတယ်။

တကယ်ဆိုဂျပန်ဟာမြန်မာ့ကျေးဇူးရှင်နိုင်ငံပါ။ဖက်ဆစ်ဂျပန်ကိုတိုက်ထုတ်တယ်ဆိုတာရုပ်ရှင်ထဲမှာပဲရှိတယ်။လက်တွေ့အခြေအနေကဂျပန်လုပ်ငန်းရှင်တွေလာကြပါ၊ဂျပန်တွေမြန်မာပြည်မှာလာစီးပွားရှာဖို့မျော်နေရတာပါ။

ဂျပန်ငပု၊ဖက်ဆက်ဂျပန်၊ဘက်ခဲရို၊ခူးရကား၊ဘိရုမာ၊ခိုရေးဝနန့်ဒတ်စကား စတဲ့မြန်မာပြည်ဒုတိယ ကမ္ဘာစစ်အတွင်းအသုံးများဂျပန်စကားကိုဂျပန်ခေတ်သရုပ်ဖေါ်ကလေးကာတွန်းတွေမှာအမြဲတွေ့ရတတ်တယ်။

"ဘက်ခဲရို" နဲ့ " ခူးရကား" ကပက်ပက်စက်စက်ဆဲဆိုတာ၊ “ ခိုရေးဝနန့်ဒတ်စကား ” ကဂျပန်စစ်တပ်လုံခြုံရေးဂိတ်မှာအမြဲကြားနေရတဲ့စကား “ ဘာပစ္စည်းတွေလဲ ” အဓိပ္ပါယ်ပါ။ 

ငယ်ငယ်ကဖတ်ခဲ့တဲ့ရွှေသွေး၊တေဇ၊ရွှင်ပြုံးကာတွန်းမှာဒီဂျပန်စကားအမြဲပါတယ်။ကာတွန်းသန်းကြွယ်ကလေးကာတွန်းဇတ်လမ်းလေးမှာပိုတွေ့ရမယ်ထင်တယ်။ကာတွန်းဦးဘကြည်ကာတွန်းမှာလည်းဒီဂျပန်စကားတွေ့ရတတ်တယ်။မြန်မာပြည်မကတကမ္ဘာလုံးထင်ရှားတဲ့ဂျပန်စကားအချို့မှတ်မိသလောက်ပါ။

ဘန်ဇိုင်း (Banzai ) : အရှင်သခင်သက်တော်သောင်းကျော်ရှည်ပါစေ၊

ကာမီကာဇေ (Kamikazi ) : ဘုရားသခင်၏လေအဟုန်၊

ပူရှီဒို (Bushido): သွေးသောက်ရဲမက်စိတ်ဓါတ်၊

ဆမ်မရိုင်း (Samurai ) : စစ်သူရဲကောင်း၊

ဟာရကိရိ (Harakiri) : သူရဲကောင်းတို့၏သေဆုံးခြင်း၊

ဂျပန်ဟာမြန်မာနိုင်ငံကို ၁၉၄၂ ခုနှစ်မှာဂျပန်အင်ပါယာထဲသွင်းပြီးသိမ်းပိုက်ခဲ့တယ်။ရဲဘော်သုံးကျိပ်ကိုစစ်ရေးလေ့ကျင့်ပေးပြီးဗမာ့လွတ်လပ်ရေးတပ်မတော် BIA ဖွဲ့စည်းတာကူညီပေးခဲ့တယ်။

မြန်မာပြည်ကိုနှစ် ၆၀ ကျော်ကျွန်ပြုခဲ့တဲ့ အင်္ဂလိပ်ထွက်ပြေးသွားပြီးဂျပန်ဟာမြန်မာပြည်ကို ၁၉၄၃ ဩဂတ်စ် ၁ ရက်နေ့မှာလွတ်လပ်ရေးပေးပြီးဒေါက်တာဘမော်ရုပ်သေးအစိုးရဖွဲ့ပေးခဲ့တယ်။

ဒီလွတ်လပ်ရေးကိုမြန်မာ့သမိုင်းမှာရွှေရည်စိမ်လွတ်လပ်ရေးခေါ်တယ်။အတုအယောင်လွတ်လပ်ရေးပါ။ဒီနေ့ခေတ်ဆို ဂျင်းလွတ်လပ်ရေးခေါ်မလား။ဒါပေမယ့်ဂျပန်ပေးခဲ့တဲ့ဂျင်းလွတ်လပ်ရေးဟာ မြန်မာပြည်အတွက်ဒီနေ့အထိ ၉၆ ပါးဝေဒနာပျောက်တဲ့ဂျင်းဆေးမဟာကြီးဖြစ်နေဆဲပါ။

ဂျပန်ဟာမြန်မာကို ၁၉၄၂ - ၁၉၄၅ (၃)နှစ်အုပ်ချုပ်ပြီးတခေါက်လေးဂျင်းထည့်မိပါတယ်။မြန်မာပြည်ကိုပေးနေရတဲ့ဂျပန်စီးပွားရေးအကူအညီ၊နည်းပညာအကူအညီ၊ငွေရေးကြေးရေးအကူအညီဒီနေ့ခေတ်အထိမပြီးနိုင်သေးဘူး။နောင်နှစ်ပေါင်းများစွာဂျပန်ဘဏ္ဍာရေးပံ့ပိုးမှုအပေါ်မြန်မာနိုင်ငံမှီခိုနေရအုံးမယ်ထင်တယ်။

  

၁၉၄၁ ဒီဇင်ဘာမှာဂျပန်မြန်မာပြည်ကိုတိုက်ခိုက်သိမ်းပိုက်တဲ့တချိန်ထဲမှာပိစိဖိတ်သမုဒ္ဒရာထဲမှာရှိတဲ့အမေရိကန်ပိုင်ဟာဝိုင်အီပုလဲကျွန်းကိုဂျပန်အလစ်ဝင်တိုက်ခဲ့တယ်။ပုလဲကျွန်းအတိုက်ခံရတာဟာဒုတိယကမ္ဘာစစ်ထဲအမေရိကန် ပါလာရတဲ့အဓိကအကြောင်းပါ။

ဒုတိယကမ္ဘာစစ်အပြီးဂျပန်နိုင်ငံဟာသူကျုးကျော်ခဲ့တဲ့မြန်မာအပါအဝင်အာရှတိုက်နိုင်ငံများကိုဖွံ့ဖြိုးတိုးတက်ရေးအတွက်ပြန်ကူညီပေး‌နေရတယ်။ကျနော်တို့ငယ်ငယ်စီးခဲ့တဲ့မြို့ပတ်ရထားအပြာ၊ဟီးနိုးဘတ်စ်ကားနဲ့ အခုထိတနိုင်ငံကိုလျှပ်စစ်ဓါတ် ပေးနေတဲ့လောပိတရေအားလျှပ်စစ်စက်ရုံအုပ်စုဟာဖက်ဆက်ဂျပန်ငပုလို့မြန်မာကနှိမ့်ချခေါ်ခဲ့တဲ့ဖက်ဆစ်ဂျပန်ပေးခဲ့တဲ့အကူအညီပါ။

၁၉၄၈ လွတ်လပ်ရေးရပြီးကဒီနေ့အထိမြန်မာကိုဂျပန်နိုင်ငံပေးခဲ့အကူအညီများစွာမှာလမ်းမတော် (အရင်ကားပွဲစားတန်း)မှာတည်ဆောက်နေတဲ့နှလုံးနဲ့ အာရုံကြောအထူးကုဆေးရုံသစ်ကြီးလည်းပါတယ်။ဒီဆေးရုံသစ်အတွက်ဂျပန်ကအမေရိကန်ဒေါ်လာ ၇၇ သန်းနီးပါနဲ့ညီမျှတဲ့ 

ဂျပန်ယန်းငွေ မြန်မာကိုကူညီပါမယ်။ 

၁၉၉၅ -၂၀၀၀ ခုနှစ်ကုမ္ပဏီကိစ္စနဲ့မြန်မာ့နိုင်ငံခြားကုန်သွယ်မှုဘဏ် (MFTB)အမြဲရောက်တယ်။အစိုးရဋ္ဌာနဆိုင်ရာဖွင့်တဲ့ LC (Letter of Credit) ခေါ်တဲ့ငွေလွှဲစာတမ်းကိစ္စပါ။

ဘဏ်မှာအလုပ်ကိစ္စပြောတဲ့အခါ LC No. နဲ့ပြောမှအလုပ်လုပ်လို့ရတယ်။အဲ့တုန်းကအစိုးရဋ္ဌာနရဲ့ LC No.က JDRG နဲ့စတယ်။ဥပမာ LC No: JDRG/007 … JDRG ဆိုတာ Japan Development Relief Grant ဖြစ်ပါတယ်။

ဂျပန်နိုင်ငံကူညီထောက်ပံ့ပေးထားငွေကိုအသုံးပြုပြီး MFTB ဘဏ်က ငွေလွှဲစာတမ်း LC ဖွင့်ပေးတာပါ။မြန်မာနိုင်ငံလိုအပ်တဲ့ပြည်ပကုန်ပစ္စည်းဝယ်ယူဖို့ငွေကိုဂျပန်နိုင်ငံထောက်ပံ့ငွေနဲ့ပေးချေတာပါ။

ဂျပန်နိုင်ငံဟာ သူ ၃ နှစ်ကျုးကျော်ခဲ့တဲ့မြန်မာနိုင်ငံကိုကူညီနေတာနှစ်ပေါင်း ၇၀ ကျော်ပြီ။မြန်မာ့ကိုယ့်ခြေထောက်ပေါ်ကိုယ်မရပ်မနိုင်မခြင်းဆက်ကူညီနေမယ့်သဘောရှိတယ်။

တလုံးတခဲတည်းချေးငွေ၊အတိုးမဲ့ချေးငွေ၊ Soft Loan ခေါ်တဲ့မဖြစ်စလောက်အတိုးနူန်းနဲ့ချေးတဲ့ချေးငွေ၊ကူငွေ၊ထောက်ပံ့ငွေအကြွေးလျော်အကြွေးဆပ်စနစ်အစုံနဲ့မြန်မာနိုင်ငံကိုဂျပန်ထောက်ပံ့ကူညီနေတာကြာပြီ။

ဒါကြောင့်ဂျပန်ကဩဂတ်စ် ၁ ရက် ၁၉၄၃ မှာပေးခဲ့တဲ့အတုအယောင် “ ဂျင်းလွတ်လပ်ရေး ” က မြန်မာနိုင်ငံ

အတွက် ၉၆ ပါးရောဂါပျောက်

အမှန်အကန်ဂျင်းဆေးပါ။ဂျပန်ဂျင်းလွတ်လပ်ရေး (၁၉၄၃ - ၁၉၄၅) နန်းရင်းဝန်ဒေါက်တာဘမော်အစိုးရအဖွဲ့မှစစ်ဝန်ကြီးဗိုလ်ချုပ်အောင်ဆန်း။

Source : Google

#လွင်ဦး_ရန်ကင်း