သားလိမ္မာ
အသက်ရလာပြီဆိုတော့အားဆေး
ပုံမှန်သောက်ဖြစ်တယ်။ဒီနေ့လမ်းထိပ်
ဆေးဆိုင်မှာလူစည်နေတယ်။လကုန်ရက်
ဆေးဆိုင်ရောင်းကောင်းနေတယ်။
ကောင်တာရှေ့ဝင်တန်းစီလိုက်တယ်။
အရှေ့မှာအသက်အစိတ်လောက်လူငယ်
တယောက်ဆေးဝယ်နေတယ်။ဒီနေ့ခတ်
လူငယ်တွေပုံစံကျောပိုးအိပ်နောက်မှာ
လွယ်ထားတယ်။
ဝယ်လိုက်တဲ့ဆေးတွေမှအများကြီး။
သွေးကျဆေး၊အကိုက်အခဲပျောက်ဆေး၊
ရင်ကြပ်ပန်းနာပျောက်ဆေး၊
ကျွန်တော်မသိတဲ့တဲ့ဆေးကဒ်
ဆေးအလွတ်တွေလည်းအများကြီး။
ဆေးအချို့ဗူးလိုက်ဝယ်ပြီးဆေးအချို့
တလစာတွက်ပြီးဝယ်တာကြားနေရတယ်။
ကျွန်တော်လည်းသူဆေးဝယ်နေတာ
စိတ်ဝင်တစားကြည့်နေမိတယ်။
လမ်းထိပ်ကဆေးဆိုင်ကဆိုင်ကြီး။
လက်လီလက္ကားရောင်းတယ်။
စိတ်ထင်ဒီချာတိတ်ကနယ်မှာဆေးဆိုင်
ဖွင့်ထားလို့ဒီလောက်ဆေးအများကြီး
ဝယ်နေတာထင်မိတယ်။
သူဝယ်တဲ့ဆေးတမျိုးခြင်း ကောင်တာက
သေသေချာချာထုတ်ပိုးပေးပြီးဘောက်ချာ
စာရွက်ရေးတယ်၊အားလုံးလေးသောင်းခွဲ
နီးပါးကျတယ်။ကျွန်တော်လည်းမနေနိုင်ပဲ
စပ်စုမိတယ်။
“ ညီလေးဆေးတွေများလှချည်းလား…”
“ ဟုတ်…ဦးလေး….တလစာပါ…. ”
ချာတိတ်ကကောင်တာကိုပိုက်ဆံ
ရှင်းရင်းကျွန်တော့်ဘက်လှည့်ပြောတယ်။
“ ဆေးဆိုင်ဖွင့်ထားတာလား….”
“မဟုတ်ဘူးဦး………မိဘတွေအတွက်ပါ”
ချာတိတ်ပြုံးရင်းပြောတယ်၊
“ ကျွန်တော်က လကုန်တာနဲ့အဖေတို့
အတွက်ဆေးအရင်ပြေးဝယ်တာပဲ ”
သူကဆေးထုပ်ကိုသူ့နောက်ကျောပိုးအိပ်ထဲ
ဂရုတစိုက်ထည့်ရင်ပြောတယ်။
“ မိဘတွေကရန်ကုန်မှာလား”
“ မဟုတ်ဘူးဦး………နယ်မှာ”
ဆေးထည့်ထားတဲ့ကျောပိုးအိပ်လွယ်ရင်
လူငယ်လေးက……
“ သွားပြီဦး…ကားမှီအောင်ပြေးလိုက်ဦးမယ်”
ကျွန်တော်ရင်ထဲမှာဘယ်လိုမှန်းမသိတဲ့
ကျေနပ်ပီတိတခုဖြစ်မှုကိုရတယ်။
ဒီလူငယ်လေးကိုလေးစားမိတဲ့စိတ်ဖြစ်
လာတယ်။
လူနေမှုစားရိတ်ကြီးမြှင့်လှတဲ့ရန်ကုန်မှာ
တဝမ်းတခါလုပ်ကိုင်ရင်းနယ်မှာကျန်ခဲ့တဲ့
မိဘတွေကျမ်းမာရေးအတွက်လစဉ်
ဆေးဝယ်ပို့ပေးနေတဲ့လူငယ်လေးကို
အထင်ကြီးလေးစားမိတယ်။
ရန်ကုန်ကသူတို့သားလစဉ်ပုံမှန်ပို့ပေးနေတဲ့
ဆေးကိုရတဲ့နယ်ကမိဘတွေရန်ကုန်မှာ
အလုပ်လုပ်နေတဲ့သူတို့သားကျမ်းမာပါစေ
ချမ်းသာပါစေအထပ်ထပ်ဆုတောင်း
ပေးနေမှာသေချာပါတယ်။
လွင်ဦး(ရန်ကင်း)
Comments
Post a Comment